Sonur Minn.

Langaði að deila með ykkur ljóði sem maðurinn minn samdi í kvöld. Þetta ljóð lýsir því hvernig okkur foreldrum líður.

 

Sonur minn.

 Hann drengur var lítill, duglegur og góður

Í dag er hann fíkill, siðlaus og óður

Hann á götunni dvelur, stendur á sama

Hann fíkniefni selur, engan á frama

Sprautan er vífið, hana hann velur

svona er lífið, sálina hann selur

Víst vill hann hætta, hjálp á hann hrópar

en daginn þann næsta, aftur hann dópar 

Eitt er það sem ég nú verð að segja

það sárt er að sjá hann smásaman deyja

Því þrátt fyrir eymdina og angistarhrópið

alltaf að lokum það sigrar hvelvítis dópið

Þrátt fyrir það að allt sé nú svona

þá áfram ég held að biðja og vona

Að tími þessi senn sé nú liðinn

að sér hann sjái og finni nú friðinn 

Eigið þið góða nótt og megi morgundagurinn færa okkur öllum eitthvað gott

Kv.kristín

Athugasemdir

[Ragnheiður , 27.11.2007 kl. 00:23]

Þetta er fallegt og einlægt hjá honum....góða nótt elskurnar.

[Gúnna, 27.11.2007 kl. 00:36]

Það fyrsta sem mér datt í hug eftir að hafa lesið ljóðið voru einmitt orð hennar Ragnheiðar hér á undan: fallegt og einlægt.

Gangi ykkur vel - og aldrei að gefa upp vonina!

[sunna ("simma" systir) (IP-tala skráð) 27.11.2007 kl. 08:53]

 Mikið rosalega er þetta fallegt ljóð, en samt svo sorglegt. Ég vona að allt eigi eftir að ganga vel að lokum og drengurinn ykkar að ná fótfestunni aftur. Vonandi eigið þið góðann dag.

[Kristín Snorradóttir, 27.11.2007 kl. 09:07]

Það sem gerir þetta svona fallegt er einlægnin  Upplifun okkar foreldrana á því að horfa á son okkar tínast í fíkninni er þrunginn sorg,reiði og vonbrigðum en á sama tíma er svo mikilvægt að halda voninni á lífi.

Ég segi oft við fólk sem á börn í neyslu sem er á þeim stað sem ég þekki svo vel að sjá ekkert bjart ,, að á meðan það er líf þá er von,,

Ég var svo lánsöm að þegar ég var á þeim stað að ég sá ekki neitt nema svartnættið þá var ég leidd í hendurnar á engli sem vinnur í Foreldrarhúsum og er ráðgjafi minn enn í dag og þessi engill hjálpaði mér að finna vonina

Einmitt vonin er stór partur af því að ég er andlega á þeim stað sem ég er í dag........ sátt

Eigið þið allar góðan dag

[kidda, 27.11.2007 kl. 10:07]

Yndislega einlægt og fallegt, samt svo sorglegt en satt.

Vonin er sterkt afl því án vonarinnar hefur maður ekkert

Knús

[Katrín Vilhelmsdóttir, 27.11.2007 kl. 10:31]

Mjög fallegt og einlægt ljóð, lýsir vel því ferli sem fíkill gengur í gegnum. Vona svo innilega að það fari að rætast úr því svartnætti sem dregurinn ykkar er í þessa dagana. Hafið það sem allra best

[Elísabet Sóley Stefánsdóttir, 27.11.2007 kl. 11:25]

YNDISLEGT, ég er nú barasta með tárin í augunum hérna í kennslustund.  Eigið góðan dag elskurnar

[Bergþóra Guðmunds, 27.11.2007 kl. 11:43]

mikið skil ég ykkur vel,,,fallegt ljóð. guð geymi ykkar fjölskyldu

[Ragnheiður , 27.11.2007 kl. 14:50]

Vonin er það haldreipi sem maður hefur í gegnum þessa erfiðleika...svo stundum tekur lífið afkáralega beygju. Ég bjóst alveg eins við að missa þann son sem fíknin hefur herjað á, datt ekki í hug að ég myndi missa annan hinna strákanna.....

Kærleikskveðja til þín

[Jóna Á. Gísladóttir, 30.11.2007 kl. 00:51]

kær kveðja til ykkar

[Greta Björg Úlfsdóttir, 1.12.2007 kl. 23:20]

Mikið rosalega er þetta lýsandi, átakanlegt og flott ljóð hjá manninum þínum.

[Greta Björg Úlfsdóttir, 1.12.2007 kl. 23:22]

Ég ætlaði að fara að setja tengil á ljóðið í bloggið mitt, svo að bloggvinir mínir sæju það, því mér finnst þetta vera ljóð sem eigi erindi til margra, - en finn ekki slóð sem vísar beint á það - væri í lagi að ég birti það í blogginu mínu einhvern tíma seinna? Kveðja, Greta Björg.

[Kristín Snorradóttir, 2.12.2007 kl. 00:23]

Greta... bara velkomið að setja ljóðið á bloggið þitt.

[Erla (IP-tala skráð) 6.12.2007 kl. 13:44]

Stína mín og Baldvin. Mikið er þetta fallega ort, vona að Ragnar Már eigi eftir að lesa ljóðið og skilja hvað hann hefur góða foreldra á bak við sig. Gangi ykkur vel í baráttunni. Kv. Erla frænka

[Kristín María (IP-tala skráð) 7.12.2007 kl. 10:27]

Rosalegt ljóð, fallegt og einlægt .......